Psa 85 | MMX | STEP | Leeme Silok, ugara belemumu vam lenep kangka ram Israel; ugara lok pam nema leme Israel la uga lox asang kobot amu manga nama.

Psalms 85

Lisingising Ti Loklox Akmokso At Lenep Silok

1 Leeme Silok, ugara belemumu vam lenep kangka ram Israel; ugara lok pam nema leme Israel la uga lox asang kobot amu manga nama. 2 Ugara doxoma xepe vam lengkakapmek at limixin taram la ugara gos kepe vam levesoogong atdi.

3 Lebelemamao ram tidi ga xap tino la uga rebeng alis amlong mo lebelemamao sesele utut taram.

4 O Moroa, laradi loklox arooro atnema, una rebeng ka amlong nema basinge levenmumuat, la na xap ta u ri belengatngas amisik tinema! 5 Kereva, unabak belemamao amisik ta nema? Kereva, mo lebelemamao ram noxo xap ta? 6 Una lox alolos amu manga nema, kusu nema limixin taram manaba emi asu minu. 7 O Leeme Silok, una lox asuusu mo labalamu lexen taram, la una lok tooro nema xusu manaba sepmus. 8 Nenia ang tonga lempanga Leeme Silok ne Moroa i paase i; neni i xaape mi lenmila ridik limixin akmokso ren, mo do atoxomlong ti loklok tangtangku atnedik. 9 Tuturun tinotno do neni i gagas kusu tik lox asepsu nedi dik lok ngangao ren, la mo loklok tooro ren naba nemen amisik eburu minedik at na lenep kangka atnedik.

10 Labalamu eburu mi luruturun at ne Moroa dunaba etang; la lomokmokso eburu mi lenmila ren la dunaba esu auru. 11 Limixin mede xopok dinaba ruturun ti ne Moroa, la ne Moroa naba lox asuusu loklok mokmokso ren boro vana at laxalibet ti limixin mede xopok. 12 Leeme Silok naba lox asang kobot amu manga dik, la lenep kangka atnedik naba lox asuusu leveluxa dangdangun avukat. 13 At lengkot axap Leeme Silok it pas teren, loklok mokmokso naba umsu la kerepmo langas i gagas tin.